काठमाडौं । नेपाल कम्युनिस्ट पार्टी (बहुमत) निकट जनवर्गीय संगठनहरूले नयाँ नेतृत्व चयन गरेका छन्। शुक्रबार सम्पन्न राष्ट्रिय सम्मेलनमार्फत दुई प्रमुख संगठन - मजदुर र युवा - मा नयाँ नेतृत्वको टुंगो लागेको हो।
‘अखिल नेपाल क्रान्तिकारी ट्रेड युनियन महासंघ’को आठौँ राष्ट्रिय सम्मेलनले धु्रव खडकाको अध्यक्षतामा २५ सदस्यीय केन्द्रीय समिति निर्वाचित गरेको छ। नयाँ समितिमा प्रतिमा बजगाई उपाध्यक्ष र विक्रम पौडेल महासचिव चयन भएका छन्।
त्यस्तै, ‘कम्युनिस्ट युवा संगठन, नेपाल’ (परिवर्तित नाम) को ऐतिहासिक प्रथम राष्ट्रिय सम्मेलन सम्पन्न गर्दै पुनः हरिष भट्टलाई अध्यक्षमा निर्वाचित गरेको छ। सम्मेलनले ५५ सदस्यीय केन्द्रीय समिति चयन गरेको छ जसमा प्रमोद सिंह धामी उपाध्यक्ष, भुवन रम्तेल महासचिव, तथा दिपेन्द्र ऐरी, प्रकाश शर्मा, लोकेन्द्र राई र भिम सुर्खेती सचिवमा चयन भएका छन्। ज्योतिष कुमार राय कोषाध्यक्ष रहेका छन्।
नवगठित समितिले अभिनाष कुवँर (पूर्व उपाध्यक्ष) र झलक विश्वकर्मा (पूर्व महासचिव) लाई संगठनबाट बिदा गरी पार्टीको जिम्मेवारीमा पठाएको छ।
