काठमाडौं । नेपाल कम्युनिस्ट पार्टी (बहुमत) निकट अखिल (क्रान्तिकारी) ले शिक्षक आन्दोलनमाथि गरिएको राज्य दमनको घोर भत्सर्ना गरेको छ।
संगठनका केन्द्रीय अध्यक्ष विरेन्द्र शाहले सोमबार एक प्रेस वक्तव्य जारी गर्दै २०२८ सालको पञ्चायती शिक्षा ऐनको खारेजी र नयाँ शिक्षा ऐन जारीको मागसहित सञ्चालन भइरहेको शिक्षक आन्दोलनमाथि प्रहरीले गरेको निर्मम र बर्बर दमनप्रति गम्भीर आपत्ति जनाएका छन्।
वक्तव्यमा अध्यक्ष शाहले शिक्षकहरूको शान्तिपूर्ण आन्दोलनमाथि गरिएको दमनले दलाल संसदीय राज्यसत्ताको जनविरोधी र दमनकारी चरित्रलाई उजागर गरेको उल्लेख गर्दै यसको सशक्त प्रतिरोध अपरिहार्य भएको चेतावनी दिएका छन्।
दमनबाट दर्जनौं शिक्षक, विद्यालय कर्मचारी तथा केही पत्रकार घाइते भएको घटनाप्रति दुःख व्यक्त गर्दै उनले घाइतेहरूको शीघ्र स्वास्थ्यलाभको कामना गरेका छन् र उनीहरूको निःशुल्क उपचारको तत्काल व्यवस्था गर्न सरकारसँग माग गरेका छन्।
त्यस्तै, अध्यक्ष शाहले शिक्षक तथा विद्यालय कर्मचारीहरूले उठाएका न्यायिक मागहरू अविलम्ब सम्बोधन गर्न र निःशुल्क, समान तथा वैज्ञानिक शिक्षाको कार्यान्वयन सुनिश्चित हुने गरी नयाँ शिक्षा ऐन तुरुन्त जारी गर्न सरकारलाई जोडदार आग्रह गरेका छन्।
