ए महोदय
शून्यता छाएको जस्तो देखिने
यो मौनता
मुर्दा मौनता होइन,
यो त
सुर्योदय हुनेबेला
उषाकिरणको लालीमा हो
अर्थात
बाच्न उर्जा दिनेसक्ने
मौनता हो !
स्थिर जस्तो
देखिने यो मौनता,
वर्षो देखि अनवरत
निरन्तर दबाब खेप्दै
सहनशक्ती क्षीण भएर
तिमिले टेकेको जमिनमुनि नै
पडकिन सक्ने
विष्फोटक ज्वालामुखी जस्तै हो
यो मौनता !
हलचल विहिन
कुनै तलाउको
ठहराव जस्तो होइन
यो मौनता,
यो त
शान्त समुद्रमा
अत्यास लाग्दो आँधी
ल्याउन सक्ने
मौनता हो !
सन्नाटा छाएको
जस्तो अनुभुती हुने
यो मौनता,
उजाड मरुभूमिमा
हुरि ल्याउने सक्ने मौनता हो !
निभिसकेको आगो
ताप बिनाको
खरानीको थुप्रो जस्तो लाग्ने
यो मौनता,
खरानी भित्र लुकेका
फिलिङ्गाहरुबाट
अर्को भर्भराउदो आगो ओकल्न सक्ने
मौनता हो !
बर्वाद बाट आवाद
कैद बाट आजाद
उजाड बाट उर्वर हुनलाई
संघर्ष गर्नसक्ने
विद्रोही मौनता हो !
खासमा नि
यो मौनता
आँधी आउनु अघिको सन्नाटा हो !!
